ភ្នំពេញ៖ ឯកអគ្គរដ្ឋទូតអាម៉េរិកប្រចាំកម្ពុជា បានលើកឡើងថា រដ្ឋាភិបាលសហរដ្ឋអាម៉េរិក មានការប្តេជ្ញាចិត្តក្នុងការការពារសេរីភាពសារព័ត៌មាននៅជុំវិញពិភពលោក និងធានាឲ្យអ្នកសារព័ត៌មានអាចបំពេញការងាររបស់គេ ដោយមិនខ្លាចនូវការសងសឹក។
ការថ្លែងនេះរបស់លោកឯកអគ្គរដ្ឋទូតអាម៉េរិក W. Patrick Murphy ពិធីជួបជុំប្រចាំឆ្នាំជាមួយអ្នកសារព័ត៌មាន កាលពីពេលថ្មីៗនេះ ដោយមានអ្នកចូលរួមមកពីសារព័ត៌មាន និងអ្នកធ្វើការក្នុងប្រព័ន្ធផ្សព្វផ្សាយ ក្នុងរាជធានីភ្នំពេញ ចំនួនជាង ៥០ នាក់។
ស្ថានទូតអាម៉េរិក បានឲ្យដឹងថាពិធីនេះ ដែលណែនាំឲ្យពួកគេស្គាល់លោកស្រីអនុប្រធានស្ថានទូត Bridgette Walker និងលោកស្រីជាប្រធានផ្នែកកិច្ចការសាធារណៈ Katherine Diop ជាឱកាសមួយក្នុងការថ្លែងការសរសើរដល់អ្នកសារព័ត៌មាន ចំពោះតួនាទីរបស់គេ ក្នុងការធ្វើឲ្យសង្គមទទួលបានព័ត៌មាន ប្រកបដោយលក្ខណៈត្រឹមត្រូវតាមក្រមសីលធម៌សារព័ត៌មាន លើកកម្ពស់នូវតម្លាភាព និង គណនេយ្យភាព៕
