សង្គមស៊ីវិលនិងពលរដ្ឋទទូចឱ្យអាជ្ញាធរមានសមត្ថកិច្ចចាត់វិធានការម៉ឺងម៉ាត់ ចំពោះម្ចាស់ស្ថានីយនិងដេប៉ូដែលលួចបន្លំចំណុះប្រេង ពីព្រោះបញ្ហានេះ ធ្វើឱ្យខាតបង់ដល់អ្នកប្រើប្រាស់ និងសេដ្ឋកិច្ចជាតិរាប់រយលានដុល្លារក្នុងមួយឆ្នាំ។ ការអំពាវនាវនេះធ្វើឡើង បន្ទាប់ពីអង្គភាពជំនាញនៃក្រសួងពាណិជ្ជកម្ម បានរកឃើញម្ចាស់ស្ថានីយ ឬដេប៉ូប្រេងឥន្ធនៈមួយចំនួន ប្រកបរបរមិនស្មោះត្រង់និងមិនអនុលោមតាមច្បាប់ស្ដីពីកិច្ចការពារអ្នកប្រើប្រាស់។
មន្ត្រីអង្គការសង្គមស៊ីវិលលើកឡើងថា ការកើនឡើងនៃចំនួនស្ថានីយ ឬដេប៉ូប្រេងដែលអនុវត្តខុសច្បាប់ នឹងប៉ះពាល់ធ្ងន់ធ្ងរដល់ស្ថានភាពសេដ្ឋកិច្ចសង្គម និងជីវភាពរស់នៅរបស់ពលរដ្ឋអំឡុងពេលរីករាលដាលជំងឺកូវីដ-១៩ នេះ។
ប្រធានអង្គការតម្លាភាពកម្ពុជា លោក ប៉ិច ពិសី លើកឡើងថា ថាបច្ចុប្បន្ននិន្នាការកេងបន្លំបរិមាណ និងគុណភាពប្រេងនៅតាមស្ថានីយ ឬដេប៉ូប្រេងឥន្ធនៈមួយចំនួន បានប៉ះពាល់ដល់បរិយាកាសប្រកួតប្រជែងអាជីវកម្ម និងជីវភាពពលរដ្ឋធ្ងន់ធ្ងរ។ លោកសង្កេតឃើញថា ពលរដ្ឋត្រូវចំណាយប្រាក់ច្រើនលើផលិតផលនេះ ប៉ុន្តែពួកគាត់ទទួលបានគុណភាពនិងបរិមាណតិច។ លោកថា ការបន្លំបរិមាណ និងគុណភាពប្រេងឥន្ធនៈនេះ ធ្វើឱ្យខាតបង់ថវិកាពលរដ្ឋ និងជាតិរាប់រយលានដុល្លារក្នុងមួយឆ្នាំ ។ លោកទទូចឱ្យអាជ្ញាធរពង្រឹងការអនុវត្តច្បាប់ឱ្យម៉ឺងម៉ាត់និងស្មើភាពគ្នា ហើយដាក់ទោសទណ្ឌចំពោះអ្នកប្រព្រឹត្តខុសដោយគ្មានការរើសអើង។ មន្ត្រីសង្គមស៊ីវិលរូបនេះលើកទឹកចិត្តពលរដ្ឋត្រូវហ៊ានរាយការណ៍ ឬប្តឹងទៅអាជ្ញាធរពាក់ព័ន្ធជុំវិញរឿងនេះ ដើម្បីទាមទារភាពត្រឹមត្រូវ ព្រមទាំងធានានូវបរិយាកាសធុរកិច្ច និងជំរុញឱ្យដំណើរការអាជីវកម្មស្អាតស្អំ៖ «ជំរុញប្រសិទ្ធភាពរឿងហ្នឹងមិនពិបាកទេ គឺយើងអាចគោលការណ៍គតិយុត្តិ ជំរុញការអនុលោមហ្នឹងឱ្យស្មើភាពគ្នា ហើយបើយើងធ្វើ មិនស្មើភាពគ្នា ហើយមានការរើសអើង មានន័យថាយើងធ្វើទៅយើងចាប់បាន យើងដាក់ទោសហ្នឹង ក៏ប៉ុន្តែអ្នកផ្សេងរួចខ្លួនឧទារហណ៍ ចឹងគឺបង្កើតបរិយាកាសមួយអត់ស្មើភាពគ្នាទៀត ចឹងទៅគេអត់ខ្លាចទេព្រោះគេប្រើប្រាស់វិធីសាស្ត្រផ្សេងៗក្នុងការដោះស្រាយបញ្ហាហ្នឹង ចឹងធ្វើឱ្យច្បាប់យើងខ្សោយ អ៊ីចឹងអ្នកអនុវត្តច្បាប់ធ្វើកិច្ចការអត់ទៅមុខទេ ហើយរឿងហ្នឹងកើតម្តងហើយម្តងទៀត»។
អ្នករត់ឡានឈ្នួលម្នាក់ លោក ម៉ៅ ឆន ត្អូញត្អែរថា ពលរដ្ឋដែលប្រកបមុខរបរដូចលោកកំពុងរងផលប៉ះពាល់ដោយសារតម្លៃសាំងនៅលើទីផ្សារហក់ឡើងថ្លៃ ហើយលើសពីនេះ ម្ចាស់ស្ថានីយ ឬដេប៉ូប្រេងមួយចំនួនបែរជាលួចបន្លំគុណភាព និងចំណុះប្រេងសាំងបន្ថែមទៀត ។ លោកសង្ស័យថាបញ្ហានេះអាចកើតឡើងដោយសារអំពើពុករលួយ ។ លោកស្នើដល់ម្ចាស់អាជីវកម្មត្រូវប្រកបមុខរបរដោយស្មោះត្រង់ ដោយត្រូវលក់ប្រេងដែលមានគុណភាពនិងគ្រប់ចំណុះដល់អតិថិជនរបស់ខ្លួន៖« ថ្មីៗដូចជាខ្ញុំទៅខេត្តព្រៃវែង ហ្គារ៉ាសមួយនោះខ្ញុំចាក់៣០លីត្រ ចាក់មិនដល់២៥លីត្រផង នេះជារឿងមួយដែលខ្ញុំគិតថាមិនគួរណាបណ្តោយឱ្យអ្នកប្រកបអាជីវកម្មទាំងអស់ហ្នឹងបន្តធ្វើរៀបហ្នឹងទៀតទេ គួរយកច្បាប់យកទៅអនុវត្តឱ្យបានទូលំទូលាយធ្វើឱ្យស្មើមុខស្មើមាត់គ្នា មិនមែនថាខ្សែអ្នកនេះអត់ហ៊ាន ខ្សែអ្នកនោះអត់ហ៊ានអត់អ៊ីចឹងទេ យកច្បាប់ទៅអនុវត្តទាំងអស់គ្នាទៅបាទ»។
ការលើកឡើងរបស់មន្ត្រីសង្គមស៊ីវិល និងពលរដ្ឋនេះ គឺស្របពេលអង្គភាពជំនាញនៃក្រសួងពាណិជ្ជកម្មកំពុងចុះត្រួតពិនិត្យករណីក្លែងបន្លំបរិមាណ និងគុណភាពនៅតាមស្ថានីយ និងដេប៉ូប្រេងឥន្ធនៈជាច្រើនកន្លែងទូទាំងប្រទេស ហើយម្ចាស់ស្ថានីយមួយចំនួនត្រូវបានចាប់ខ្លួនបញ្ជូនទៅតុលាការ។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បានបង្ហោះនៅលើទំព័រហ្វេសប៊ុករបស់ខ្លួនកាលពីថ្ងៃទី១៤ តុលាថាមន្ត្រីជំនាញ ក.ប.ប ប្រចាំខែខេត្តបាត់ដំបង សៀមរាប កំពង់ចាម និងខេត្តកំពង់ស្ពឺ បានរកឃើញស្ថានីយ ឬដេប៉ូប្រេងឥន្ធនៈចំនួន៩កន្លែងបន្ថែមទៀត ដែលប្រកបរបរមិនស្មោះត្រង់និងមិនអនុលោមតាមច្បាប់ ក្នុងចំណោម១៩ស្ថានីយ ឬដេប៉ូប្រេង។ អង្គភាពដដែល បញ្ជាក់ថា ស្ថានីយ ឬដេប៉ូប្រេងដែលបានប្រកបអាជីវកម្មកេងប្រវ័ញ្ចអ្នកប្រើប្រាស់ ត្រូវធ្វើការពិន័យតាមបញ្ញត្តិច្បាប់ និងតម្រូវឱ្យកែប្រែទៅរកភាពត្រឹមត្រូវឡើងវិញជាដើម។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) លោក ផាន អូន ប្រាប់វិទ្យុអាស៊ីសេរីបន្ថែមដោយខ្លីថា គោលបំណងដែលអង្គភាពលោកចុះពិនិត្យករណីនេះ គឺជាការអនុវត្តច្បាប់ដើម្បីកែសម្រួលការប្រកបមុខរបរ ឬធុរកិច្ចណាមួយដែលមិនសុចរិត និងការពារផលប្រយោជន៍សេដ្ឋកិច្ចជូនអ្នកប្រើប្រាស់។
ទោះជាយ៉ាងណា នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ យល់ថាសកម្មភាពដែលអាជ្ញាធរចុះត្រួតពិនិត្យមាត្រដ្ឋាន ឬចំណុះសាំងនៅតាមស្ថានីយ ឬដេប៉ូប្រេងឥន្ធនៈជាបន្តបន្ទាប់នេះ ដោយសារតម្លៃប្រេងសាំងនៅលើទីផ្សារឡើងថ្លៃ ហើយការប្រកួតប្រជែងអាជីវកម្មកាន់តែខ្លាំង ដែលធ្វើឱ្យអ្នកប្រើប្រាស់មានមន្ទិលជុំវិញសុចរិតភាព។ លោកបន្តថា ការប្រកបរបរមិនស្មោះត្រង់និងមិនអនុលោមតាមច្បាប់ពីសំណាក់ម្ចាស់ស្ថានីយ៍លក់ប្រេងឥទ្ធនៈមួយចំនួននេះ កើតឡើងជាប្រព័ន្ធ ដែលប៉ះពាល់ធ្ងន់ធ្ងរដល់សង្គម៖ «ការដោះស្រាយបញ្ហាគ្រប់លីត្រ ឬក៏បរិមាណការលក់ប្រេងឥន្ធនៈនៅប្រទេសកម្ពុជា ការអន្តរាគមន៍របស់អាជ្ញាធររដ្ឋក្នុងការធ្វើឱ្យមានភាពស្មើគ្នានៃកាតព្វកិច្ចពន្ធក៏ជាហេតុផលមួយ បើវាក្លាយជាប្រធានបទនីតិរដ្ឋនៃវិស័យប្រេងឥន្ធនៈ អាចធ្វើឱ្យការប្រកួតប្រជែងស្មើភាព ហើយក៏អាចឈានមកដល់ការអនុវត្តសុចរិតភាពការផ្គត់ផ្គង់អាជីវកម្មប្រេងឥន្ធនៈដែរ»។
មន្ត្រីសង្គមស៊ីវិលទទូចឱ្យអាជ្ញាធរមានសមត្ថកិច្ច ពង្រឹងការអនុវត្តច្បាប់ និងបង្កើនសកម្មភាពចុះស៊ើបអង្កេតនៅតាមស្ថានីយ ឬដេប៉ូប្រេង ដោយអនុលោមតាមច្បាប់ស្តីពីកិច្ចការពារអ្នកប្រើប្រាស់។ ទន្ទឹមនឹងនេះ មន្ត្រីពាក់ព័ន្ធត្រូវធ្វើការណែនាំដល់ម្ចាស់អាជីវកម្មលើស្មារតីស្មោះត្រង់ សុចរិតភាព និងការទទួលខុសត្រូវចំពោះអ្នកប្រើប្រាស់ ដើម្បីធានានូវស្ថិរភាពអាជីវកម្មលើគោលការណ៍ប្រកួតប្រជែងដោយស្មើភាព និងផ្តល់ទំនុកចិត្តដល់អតិថិជនផង៕
