កំពង់ចាម រួម​សហការ​គ្នា​ ដេីម្បី​ធ្វើ​ការ​ប្រឆាំង​ទប់ស្កាត់​រាល់​ព័ត៌មាន​ក្លែងក្លាយ​ ពី​គ្រប់​មជ្ឈដ្ឋាន​ ដែល​ក្រុម​ជ្រុល​និយម​មួយ​ចំនួន​បាន​ឆ្លៀត​ឱកាស​បំពុល​សង្គម​ ឲ្យ​ធ្លាក់​ក្នុង​សភាព​វឹកវរ​ ។ ការ​ស្នើ​ឡើង​យ៉ាង​ដូច្នេះ​ក្នុង​កិច្ច​ប្រជុំ​រវាង​អ្នក​សារព័ត៌មាន​មក​ពី​ស្ថាប័ន​​ឯកជន​ និង​រដ្ឋ​ប្រមាណ​ជាង​២០នាក់​ កាល​ពី​រសៀល​ថ្ងៃ​ទី​៣១​ ខែសីហា​ ឆ្នាំ​២០២០​ នៅ​មន្ទីរ​ព័ត៌មាន​ខេត្ត​កំពង់ចាម​ ។

ក្នុង​កិច្ច​ប្រជុំ​នោះ​ដែរ​ លោក​ស្រី​សម​ ផល្លា​ ប្រធាន​មន្ទីរ​ព័ត៌មាន​ខេត្ត​កំពង់ចាម​ បាន​ធ្វើ​ការ​ណែនាំ​ដល់​អ្នក​សារព័ត៌មាន​ទាំង​អស់​ ឲ្យ​គោរព​តាម​ក្រមសីលធម៌​វិជ្ជាជីវៈ​ជា​អ្នក​សារព័ត៌មាន​ ដេីម្បី​នាំ​យកដំណឹង​ពី​មហាជន​ជួន​ដល់ថ្នាក់ដឹកនាំ​រាជរដ្ឋាភិបាល​ និង​នាំ​យក​ដំណឹង​ពី​រាជរដ្ឋាភិបាល​ជួន​ទៅ​មហា​ជន​វិញ​ ប្រកប​ដោយ​និរន្តភាព​ ដើម្បីឆ្លើយតបទៅនឹងតម្រូវការបច្ចុប្បន្ន​ និងអនាគតរបស់ភាគីពាក់ព័ន្ធទាំងអស់។

លោកស្រី​ប្រធាន​មន្ទីរ​ព័ត៌មាន​ខេត្ត​ បាន​បញ្ជាក់​ថា​ កិច្ច​ប្រជុំ​នេះ​បាន​ធ្វើ​ឡើង​ក្នុង​គោលបំណង​ ដើម្បី​បង្កើន​ភាព​ទំនាក់ទំនង​ជិតស្និទ្ធ​​ និង​ស្វែងយល់​ពី​គ្នា​ទៅ​វិញ​ទៅមក​ រវាង​បងប្អូនជា​​អ្នក​សារព័ត៌មាន​វិស័យ​​ឯកជន​ និង​ស្ថាប័ន​រដ្ឋ​ ធ្វើ​យ៉ាងណា​យេីង​ត្រូវ​រួម​សហការ​គ្នា​ ហើយ​ចងក្រង​ជា​ក្រុម​ ដេីម្បី​​រួមចំណែក​បម្រើ​វិស័យ​ព័ត៌មាន​ក្នុង​ខេត្តកំពង់ចាម​ជាមួយគ្នា​ ឲ្យ​កាន់តែ​មាន​ការ​រីកចម្រើន​ទៅ​មុខ​ទាំង​អស់​គ្នា​ ពោល​គឺ​ត្រូវ​ស្គាល់​ពី​ទុក្ខ​លំបាក​ និង​ត្រូវ​ចេះ​ជួយ​គ្នា​គ្រា​ដែលមាន​អាសន្ន​ ។ ​

ជាមួយគ្នា​នោះ​ លោកស្រី​ប្រធាន​មន្ទីរ​ព័ត៌មាន​ខេត្ត​ ក៏បាន​អនុញ្ញាត​ឲ្យ​បង្កើត​ហ្គ្រុប​Telegram ដេីម្បី​​ងាយស្រួល​ក្នុង​ការ​ទំនាក់ទំនង​គ្នា​ ជា​ពិសេស​ការ​ចែករំលែក​​ដោះដូរ​ព័ត៌មាន​ ​គ្នា​ទៅវិញ​ទៅ​មក​ ក៏ដូចជា​ការ​ចែករំលែក​បទពិសោធន៍​ ប្រកប​ដោយ​ភាព​ស្និទ្ធស្នាល​ផង​ដែរ​ ៕

By pcs

Leave a Reply

Your email address will not be published. Required fields are marked *

You missed