ភ្នំពេញ

ថ្ងៃពុធ ៥ រោច ខែបុស្ស ឆ្នាំខាល
ចត្វាស័ក ពុទ្ធសករាជ ២៥៦៦
ត្រូវនឹងថ្ងៃទី១១ ខែមករា ឆ្នាំ២០២៣

ប្រមុខរដ្ឋាភិបាលមកពីប្រទេសសមាជិកទាំងបួន របស់គណៈកម្មការទន្លេមេគង្គ (ហៅកាត់​ថា MRC) ដែលរួមមាន កម្ពុជា ឡាវ ថៃ និងវៀតណាម និងគណៈប្រតិភូជាន់​ខ្ពស់មក​ពី​ប្រទេស​​ជា​​ដៃគូសន្ទនារបស់ MRC ពោលគឺចិន និងមីយ៉ាន់ម៉ា នឹងបើកកិច្ចប្រជុំកំពូល​មួយ​នាដើម​ខែមេសា​ខាងមុខនេះ ដើម្បីឆ្លើយតបនឹងបញ្ហាប្រឈមនានា និងកំណត់ជោគ​វាសនា​របស់អាង​ទន្លេមេគង្គ។ នេះបើ​យោង​តាមសេចក្ដីប្រកាសព័ត៌មានរបស់ MRC។

ក្នុងសេចក្ដីប្រកាសបានបញ្ជាក់ថា កិច្ចប្រជុំកំពូលលើកទី៤ និងសន្និសីទអន្តរ​ជាតិ​របស់ MRC នឹងប្រព្រឹត្តទៅដោយមានការចូលរួមដោយផ្ទាល់ចាប់ពីថ្ងៃទី ០២ ដល់ថ្ងៃទី ០៥ ខែ មេសា ឆ្នាំ ២០២៣ នៅទីក្រុងវៀងចន្ទ ប្រទេសឡាវ។ ព្រឹត្តិការណ៍កម្រិតនយោបាយ ខ្ពស់​​បំផុតរបស់ស្ថាប័ននេះ នឹងនាំឱ្យប្រទេសតាមដងទន្លេមេគង្គទាំង៦ ជួបពិភាក្សា​ពីការ​អភិវឌ្ឍថ្មីៗ កាលានុវត្ដន៍ និងដំណោះស្រាយបែបនវានុវត្តន៍លើបញ្ហាប្រឈមនានា ដោយ​រាប់​ចាប់ពីផលវិបាកនៃ ការអភិវឌ្ឈ ដែលពាក់ព័ន្ធនឹងទឹករហូតដល់ការប្រែប្រួល​អាកាស​ធាតុ ដែលបាននិងកំពុងជះឥទ្ធិពលដល់ទន្លេមេគង្គ ដែលជាមធ្យោបាយផ្លូវទឹក​ធំជាង​គេ​បំផុតនៅតំបន់អាស៊ីអាគ្នេយ៍។

បណ្ឌិត អានុល័ក វិធិឃួន (Anoulak Kittikhoun) នាយកប្រតិបត្តិនៃលេខាធិការដ្ឋាន MRC បានថ្លែងថា “ទន្លេមេគង្គកំពុងឆ្លងកាត់នូវការផ្លាស់ប្តូរយ៉ាងសម្បើម។ យើងត្រូវតែច្នៃ​ប្រឌិតឥតឈប់ឈរ ទាំងនៅក្នុងផ្នែកគោលនយោបាយ យុទ្ធសាស្ត្រ និងបច្ចេកវិទ្យា ដើម្បី​នាំឱ្យការគ្រប់គ្រង និងអភិវឌ្ឍន៍ អាងទន្លេមេគង្គកាន់តែមានទំនួលខុសត្រូវ និងប្រកប​ដោយ​​ចីរភាព” ។

បើតាម MRC កិច្ចប្រជុំកំពូលលើកទី៤ នឹងនាំមុខដោយសន្និសីទអន្តរជាតិមួយ នៅ​ថ្ងៃទី ០២ និងថ្ងៃទីទី ០៣ ខែមេសា ឆ្នាំ ២០២៣ ដែលនឹងពិភាក្សាជុំវិញប្រធានបទ “នវា​នុវត្តន៍​និងកិច្ចសហប្រតិបត្តិការសម្រាប់សន្តិសុខ ទឹក និងទន្លេមេគង្គប្រកបដោយ​ចីរភាព”។ សន្និសីទនេះ​ ត្រូវបានគេរំពឹងថានឹងមានការចូលរួមពីភាគីពាក់ព័ន្ធ ជំនាញការ និងអ្នកចាប់អារម្មណ៍ពីកិច្ចការទន្លេមេគង្គនៅទូទាំងពិភពលោកទាំងអស់ប្រមាណ ៤០០ នាក់ ដោយរាប់ចាប់ពីស្ថាប័នរដ្ឋាភិបាល អង្គការអន្តរជាតិ វិស័យឯកជន អ្នកស្រាវជ្រាវ និងសង្គមស៊ីវិល។ អ្នកចូលរួម ទាំងអស់នឹងធ្វើការផ្លាស់ប្តូរទស្សនៈ​ប្រកបដោយការបំផុស​គំនិត ចំណេះដឹងដែលបានអនុវត្តន៍ រួមទាំង បទពិសោធន៍ជាក់ស្ដែងជុំវិញ​នវានុវត្តន៍ពាក់​ព័ន្ធនឹងទឹក ដើម្បីពង្រឹងកិច្ចសហប្រតិបត្តិការទន្លេមេគង្គ។ ទន្ទឹមនេះ សាធារណជន ឬអង្គ​ភាពនានាដែលចាប់អារម្មពីត្រូវចុះឈ្មោះចូលរួមជាមុន។ អ្នកជំនាញការ ត្រូវបានស្វាគមន៍​ឱ្យ​​ដាក់សំណើរធ្វើបទបង្ហាញនៅឯសន្និសីទនេះ។

ព្រឹត្តិការណ៍ជាសកលនេះ នឹងគ្របដណ្តប់លើការឆ្លុះបញ្ចាំងពីការអភិវឌ្ឍ និង​ទស្ស​នា​​​ទាននានា ព្រមទាំងបញ្ហាក្នុងការគ្រប់គ្រងអាងទន្លេមេគង្គ។ សុន្ទរកថាសំខាន់ៗពី​ថ្នាក់​ដឹកនាំតាមវិស័យផ្សេងៗ នឹងរំលេចពីនវានុវត្តន៍ឈានមុខគេ នៅក្នុងផ្នែកគោល​នយោ​បាយ បច្ចេកវិទ្យា និងកិច្ចសហប្រតិបត្តិការឆ្លងដែន។ បរិបទទាំងនេះ នឹងបង្កលក្ខណៈ​ងាយ​​ស្រួលដល់ការពិភាក្សាជាក្រុម ជុំវិញបច្ចេកវិទ្យា និងកិច្ចសហប្រតិបត្តិការបែបច្នៃ​ប្រឌិត​​ផ្សេងៗ ដែលបាននិងកំពុងផ្លាស់ប្ដូរការគ្រប់គ្រងទឹកឆ្លងដែន និងរបៀបដែល​ហិរញ្ញ​ប្បទានមានទំនួលខុសត្រូវ និងបរិយាបន្នផ្នែកយេនឌ័រ ឱ្យមានភាពខុសប្លែកគ្នានៅ ក្នុង​របៀប​គ្រប់គ្រងធនធានទឹក។ អ្នកចូលរួមនឹងបានឃើញកិច្ចពិភាក្សាដ៏ទាក់ទាញ ការតាំង​ពិព័រណ៍បែបអន្តរកម្ម និងការចែករំលែកនូវបច្ចេកវិទ្យាទំនើបៗ និងដំណោះស្រាយប្រកប​ដោយប្រឌិតញាណ ដែលអាចចូលដោះស្រាយបញ្ហាប្រឈមនានារបស់ទន្លេមេគង្គឱ្យ​កាន់​តែមានប្រសិទ្ធភាព។

ជាមួយគ្នានេះដែរ សារៈសំខាន់ៗ និងអនុសាសន៍ដែលអាចអនុវត្តន៍បានពីសន្និសីទ នឹងដាក់ទៅក្នុងកិច្ចប្រជុំកំពូល ទីដែលថ្នាក់ដឹកនាំពីប្រទេសតាមដង​ទន្លេមេគង្គនឹង​ធ្វើការ​កំណត់ពីអនាគត និងទិសដៅជាយុទ្ធសាស្ត្រ សម្រាប់ទន្លេមេគង្គ។

សូមជម្រាបជូនថា កិច្ចប្រជុំកំពូលនេះ គឺជាព្រឹត្តិការណ៍កម្រិតនយោបាយ​ខ្ពស់​បំផុត​របស់ MRC សំដៅលើកកម្ពស់កិច្ចសហប្រតិបត្តិការទន្លេមេគង្គ ក្រោមក្របខណ្ឌ MRC តាម​រយៈការពង្រឹងសាមគ្គីភាព និងការកំណត់ ទិសដៅរួមក្នុងចំណោមប្រទេសតាមដង​ទ​ន្លេ មេគង្គ​ និងភាគីពាក់ព័ន្ធ។ កន្លងមក ការរៀបចំកិច្ចប្រជុំនេះ គឺធ្វើឡើងបានចំនួនបីលើ​ករួច​មកហើយ ដោយក្នុងនោះ ក្នុងប្រទេសថៃ(២០១៣) វៀតណាម(២០១៤) និងកម្ពុជា​(២០១៨)៕

By pcs

Leave a Reply

Your email address will not be published.